Burkina Faso Har Yanzu Ba Ta Saki Jirgin Yaƙin C-130 da Sojojin Najeriya 11 Ba — Gwamnatin Tarayya
Gwamnatin Tarayyar Najeriya ta bayyana cewa har zuwa yanzu ƙasar Burkina Faso ba ta saki jirgin yaƙin sama samfurin C-130 na Najeriya ba, tare da ci gaba da tsare sojojin Najeriya 11 da ke cikin jirgin a lokacin da aka kama shi.
A cewar Gwamnatin Tarayya, lamarin ya faru ne yayin da jirgin ke gudanar da wani aiki na tsaro a yankin Sahel, inda daga bisani jami’an tsaron Burkina Faso suka tsare jirgin tare da mutanen da ke cikinsa, ba tare da sakin su ba har zuwa wannan lokaci.
Gwamnatin ta bayyana cewa tana ci gaba da tattaunawa ta diflomasiyya da mahukuntan Burkina Faso domin warware matsalar cikin lumana, tare da neman sakin jirgin da kuma dawo da sojojin Najeriya gida lafiya.
Hukumomi sun jaddada cewa Najeriya na mutunta dangantakar da ke tsakaninta da ƙasashen yankin, musamman a fannin yaƙi da ta’addanci, kuma tana sa ran samun fahimta da haɗin kai daga gwamnatin Burkina Faso domin kawo ƙarshen wannan batu ba tare da rikici ba.
Masu sharhi kan harkokin tsaro na ganin cewa lamarin na iya shafar haɗin gwiwar tsaro tsakanin ƙasashen yankin Sahel, musamman a wannan lokaci da ake fuskantar ƙalubalen tsaro da suka haɗa da ta’addanci da ƙungiyoyin ’yan bindiga.
Munam Africa News za ta ci gaba da bibiyar cigaban al’amarin.
