Gwamnonin kudu sun jaddada bukatar kafa ’Yan Sandan Jihohi, suna cewa wannan ita ce muhimmiyar mafita ga matsalar tsaro a Najeriya.
Gwamnonin jihohin Kudancin Najeriya sun gudanar da wani muhimmin taro, inda suka cimma matsaya cewa kafa ’yan sandan jihohi ita ce hanya mafi inganci wajen magance matsalolin tsaro da ƙasar ke fuskanta.
Taron, wanda Gwamna Dapo Abiodun na Jihar Ogun ya jagoranta a Iperu Remo, ya samu halartar gwamnoni da mataimakan gwamnoni daga jihohin Ribas, Abia, Ekiti, Ebonyi, Enugu, Anambra, Osun, Edo, Oyo da Cross River.
A jawabinsa na buɗe taron, Gwamna Abiodun ya bayyana cewa tsaro a Najeriya na ƙara tabarɓarewa, musamman ganin yadda sace-sacen mutane, hare-hare da ta’addanci ke ƙaruwa a manyan birane da ƙauyuka. Ya ce:
> “Harin da ake kai wa makarantu, wuraren ibada da al’umma ya nuna cewa babu wani yanki da bai fuskanci matsalar tsaro ba.”
Ya yaba wa Shugaba Bola Ahmed Tinubu kan saurin ceto ɗaliban da aka sace a baya-bayan nan, amma ya jaddada cewa lokaci ya yi da a ɗauki matakai na musamman kan harkokin tsaro. Ya bayyana cewa kafa ’yan sandan jihohi abu ne da ba za a ƙara yin watsi da shi ba.
Gwamnonin sun kuma bayyana cewa sarakunan gargajiya za su taka muhimmiyar rawa wajen inganta tsaro, kasancewar suna da kusanci da al’umma.
A ƙarshen taron, Kungiyar Gwamnonin Kudu ta fito da matsaya guda ɗaya:
a tabbatar da kafa ’yan sandan jihohi domin samar da ingantaccen tsaro mai dorewa, wanda zai taimaka wajen magance barazanar da yankin da ƙasar baki ɗaya ke fuskanta.
